بس بيت !

عن الفندق اللى حلمه انه يبقى بيت بس مكانش دافى كفاية انه يبقى بيت .. 

فى اسطورة بتقول ان كان زمان ناس عايشين على الارض .. واصابتهم لعنة واتحول شوية منهم لبيوت وشوية لفنادق .. البيوت كانت دافية على طول ودايما طالع منها ريحة كيك و دايما فيها ورد من كل الالوان ..والفنادق كانت باردة ودايما خايفة ..حيطانها على طول بردانة .. كل اللى بيسكنها كانوا ناس بتخاف تحكى ..ومن كتر ما كانوا بيخافوا ..بطلوا يحكوا .. بقوا بيسمعوا بس وحواديتهم خلصت ..يمكن ماتت ..وفى مرة من المرات فندق منهم قرر انه عايز يتحول لبيت .. كان عايز بس يقدر يحكى ويعيط ولما يخاف يلاقى سكانه يطمنوه ..راح لساحر القرية وقرر انه يطلب منه انه يخليه بيت ..مزروع فى جنينته ورد أحمر وجواه دفاية شغالة بالخشب وكل يوم البيانو بيلعب فيه مزيكا صوتها بيخلى العصافير ترقص ..

بس الساحر مرضيش ..وقالّه ان اللعنة لو اتعكست .. ممكن القرية كلها تختفى وتبقى رماد فى ليلة..

الفندق رجع مكانه وبقى مبيحسش بحاجة ..بقى كل ما تحصل فى حفلة يعيط لوحده بعد ما تخلص ..حتى الورد اللى كل يوم كان بيتجدد لما ييجوا ضيوف جداد مبقاش يفرحه زى زمان ..فضل على الحال ده لغاية ما قرر انه يقبل فكرة انه فندق وهيفضل فندق للأبد .. ومن ساعتها قلبه مات وبطل يدق ..ومبقاش يفتح بيبانه لحد وشبابيكه سكنها غربان القرية كلهم ..ومات الفندق ..من ساعة ما بطل يتمنى انه يبقى بيت .. ومكانش يعرف ان اللعنة كانت بتخلى كل فندق يموت يتحول شجرة ..والشجرة بتبقى بيت ..للسناجب ..