رصيف نمرة 5

رصيف نمرة خمسة والشارع زحام ..

وساكت كلامنا ما لاقى كلام ..

اه والله ما عاد الكلام بيفرق .. ويفيد بايه وهو معادش يوصل اللى عايزين نوصله .. وهو ايه أصلا اللى عايزين نوصله ..

رصيف نمرة خمسة .. ومنطقتى اللى قلبى بقى بيحبها على كبر ..يمكن عشان بقى فى بينا عِشرة ..نفس الدكاترة بعيادتهم موجودين هنا والفاكهانية وبتوع محلات الموبايلات و الشوارع وما أدراك ما الشوارع ..العشق الحقيقى ..والقمر أما بينور هنا ..بيبقى نوره نورين 

والراجل اللى بيشغل عمرو دياب واغانيه القديمة بس .. .. 

خليك فاكرنى ..

أو متفتكرش .. عزيزى ..فكرت عمرك قبل كده أد الحياة مريحة من غير ذكريات .. الذكريات على قد ما هى بتبسط بتوجع بعدين .. 

.. مغفل اوى السطر اللى فات ده .. الذكريات هى احنا ..واحنا مبنحبش ننسى عشان بنحب شوية الوجع اللى مخليينا نحب روحنا اللى فيها عجايب الدنيا .. خليك فاكرنى ونصيحة متنساش حد .. ولا تنسى حاجة ..

الناس كلها بتتجوز .. عامل كأن الكوكب قد شارف على الانفجار وهيسيب فيه السناجل فيه وبس ..نحن صامدون وعلى العهد باقون .. ليه تدخل السجن برجلك طالما ممكن تبقى قاعد حر ذاتك مع أهلك اللى يبتقبلوا تقلباتك المزاجية وبيصرفوا عليك ..واكل شارب سارق نايم ببلاش .. 

عزيزى لا احد 

مسيرنا نتقابل ونشرب قهوة على النيل الصبح بدرى ومنتكلمش ولا كلمة ونقوم نروح بعدها عادى من غير ولا كلمة وساعتها هنقول كلام كتير جدا ..للنيل ..ومن غير ولا كلمة .. 

واياك تفكر بحر الشوق مهما على هيغرقنا ..

احنا اصلا مش بنعرف نعوم .. 

*طبعا واضح ان البوست مستوحى من اغانى عمرو دياب القديمة ..تراث