عايزة اكتب أيها الكون العنيد..بقالى يومين بنام كتير مش نوم هروب انما تعب ..تعبانة من ايه مش عارفة ..جايز عشان بهلكنى فى مشاوير و حاجات كتير عشان ميبقاش عندى وقت أسألنى " ازى حالى ؟" ممكن .. بس الكتابة وحشتنى جدا .. ومحتاجة اسافر كالعادة و اليوم محتاج يبقى طويل شوية .. والنوم محتاج يبقى مُشبع شوية برضه ..
رضوى كانت عايزانى أكتب لحد 20 سبب يخلى الواحد مبسوط ..ألصراحة فى اكتر من 20 سبب بس جيت اكتبهم لقيتنى نمت .. عموما ..رواية مريم أحلى حاجة حصلتلى الاسبوع ده تقريبا .. وزعلانة انها خلصت بدرى .. وسميت البطل ادم عشان اسمه بيدل على كونه انسان ..انسان وبس ..حر ..نقى .. بيحب بجد .. بيحارب .. وحقيقة انا بحب ادم ..جدا..يمكن عشان بقالى كتير متعلقتش بأبطال روايات ..ممكن ..أو يمكن عشان اصلا قالى كتير مقرتش روايات ..ممكن
درس علم النفس على كورسيرا بدأ يدخل فى الاامراض النفسية واستاذ ستيف كاتب تحذير :ان اى حد بيقرا عن الامراض دى بيحس ان عنده زيها او على الاقل اعراضها .. ما كلنا مرضى نفسيين يا ستيف .. ستيف كمان هيوحشنى لأن الكورس قرب يخلص ..معجزة انى مكملة فيه لاكتر من شهر ومزهقتش .. دى حاجة كويسة ..اللى انا بعمله ده غاببا اسمه تداعى حر وهى انى بكتب كل اللى بييجى على بالى وهم بيسموه تدوين .. وانا محبش ادون عشان بحس الموضوع كشف لسرارى اكتر ما الكتابة بتكشف ..واللى عايز تفاصيل عن حياتى ممكن يسمعها وندردش بعد ما يسألنى لو أنا عُزت ده ..
الاسبوع اللى فات دخلت مدرسة ولاد ثانوى مع صناع الحياة ... كانت اول مرة فى حياتى ادخل مدرسة ولاد بس .. وكان كأننا فى سجن ..مكانش ينفع نقف لوحدنا كبنات ولا نهزر ونضحك على طبيعتنا والاولاد مسكتوش غير لما قلتلهم انى فى سنة خامسة ...
سنة خامسة وفاضل شهرين واتخرج وبالمناسبة الشهرين كل يوم بيقّلوا .. وده عنوان اجابة سؤال : ازيك ؟ مفيش .. بستمتع باخر لحظات ببقى عارفة انا رايحة فيها منين لفين عشان داخلة على لحظات ان السجادة تتسحب ومبقاش عارفة الطريق رايح فين ..
No comments:
Post a Comment