يابحر الوجع

و أنا أَصلي واخد ع الـوجع

و أمَّا الجِـراح بِتصيـب جَدع

بيصِير وجعها بــــ مِيت وجع

تعرف يا بحر الـ ميت وجع

-هشام الجخ 

تعرف يا بحر الوجع ..ايه بيوجع أكتر من الخوف ومن الفقد ومن التوهة والتوهان .. العجز .. ..انك تكون واقف مكانك حاسس انك مش عارف تعمل حاجة و حياتك الناس بتتدخل فيها وانت جواك كتير هايج مش مجرد الكام دمعة الى بتبكيهم يمكن يفهموا .. مش بيفهموا ومش هيفهموا ..وبُكاك 

 بالنسبة لهم عادى .. مش مجرد واحد من ألف من وجعك الى جواك و بيقتل فيك كل يوم .. 

تعرف يا بحر الوجع ..حجم الذل اما تكون بتهرب من الشوارع  المنورة  للشوارع المضلمة عشان لما تعيط فى الشارع او عينك تدمع الناس متاخدش بالها  انك كبير بس لسه بتعوز تعيط كانك تايه من مامتك .. انت مش كبير اصلا ..انت عيل كبير ..وتعرف ؟؟ حجم القوة الى بتكون محتاجها عشان تبطل تفكر وتقدر تتكلم عشان تشترى مناديل لن حظك كان من السوء انك هربت من البيت بسرعة من غير ماتاخد غير روحك ونسيت مناديلك وانت واثق انك مش هتتماسك بس كان كل همك تهرب قبل ما روحك تتخنق من قلة الهوا..

تعرف يا بحر .. انك بتجيلى فى حلمى كل يوم ومش قادرة اطولك ولا قادرة اجيلك ..انت بيتى بس مش ساكناك .. تعرف انى حاساك مفتقد دموعى ..طيب فاكر أخر مرة نسيت عندك ..واخر مرة ضحكتلك ضحكة الوداع الى واثقة اننا هنتقابل تانى ..تعرف انك بتفهمنى اكتر م البشر ..طيب فاكر اما كانت موجك بيهدى قدامى وانا شايفاه هايج بعيد ..طيب فاكر اما كنت ببكيلك فتهيج كأنك عايز تموت الى خلانى أعيط ..

ماحالها الأميرة ؟ 

قريبا قد تهجر المملكة  وربما قد هجرتها المدينة مسبقا ..

تعرف يا بحر الوجع .. سيطلع من عتمتى قمر وبكره الشمس تطلع بس لحد الوقت ده ..هيج بدالى

وكختام كل المراسيل ..بحبك